Կուլիկամի երիտասարդները Տեր Նարեկ քահանա Տիգրանյանի գլխավորությամբ ուխտագնացություն կատարեցին Աբլարի Սուրբ Ելենա եկեղեցի:
Ուխտագնացությունն սկսվեց Կուլիկամ գյուղի Սբ. Երրորդություն եկեղեցուց:
Ուխտագնացները ծանոթացան հայրենի երկրի պատմամշակութային և հոգևոր արժեքներին, լսեցին Տեր Նարեկ քահանա Տիգրանյանի մեկնաբանությունները Ջավախքի եկեղեցական կառույցների ճարտարապետական առանձնահատկությունների վերաբերյալ: Ինչպես նաև զրուցեցին եկեղեցական տոների՝ Վարդավառի, Տիառնընդառաջի, Ծաղկազարդի մասին:
Աբլարը հայտնի է ոչ միայն իր սառնորակ ջրերով, այլև սրբավայրերով: Այստեղ է գտնվում Սուրբ Ելենա կիսավեր եկեղեցին: Եկեղեցուց որոշակի հեռավորության վրա է գտնվում «Յոթ ախպար» ուխտատեղին: «Յոթ ախպար»՝ քանի որ այստեղ յոթ խաչքար կա, իսկ խաչքարերի մեջտեղից ջուր է հոսում: Ըստ լեգենդի, այն մարդը, ով այստեղից յոթ բաժակ ջուր խմի, նրա երազանքը կիրականանա:
Աբլարը ոչ միայն ուխտատեղի է, այլև հանգստյան գոտի:
