CYLCHLYTHYR CHWEFROR 2026 FEBRUARY newsletter 2026

Chwaraeon / Sports

Mae disgyblion wedi cymryd rhan mewn gweithgareddau chwaraeon yn ystod yr hanner tymor yma gan gynnwys:

Pupils have taken part in sporting activities during this half term including:

Blwyddyn 5/6 - Gŵyl pêl-rwyd Merched a Chymysg yr Urdd yng Nghanolfan Pentre Awel, Llanelli / Girls and Mixed Urdd Netball at Pentre Awel Centre, Llanelli

Meithrin

Yn ystod yr hanner tymor yma rydym ni wedi bod wrth ein bodd yn dysgu llawer am ein tymor newydd a sut i ofalu am yr anifeiliaid tu allan yn y tywydd oer. Dysgom am wahanol adar sydd o gwmpas a chafodd pawb gyfle i fynd am dro o amgylch yr ysgol i weld pa adar oedd yna. Gofynnodd y plant pa fath o fwyd roedd yr adar yn hoffi a dechreuom greu bwyd blasus iddyn nhw gan ddefnyddio hadau a menyn cnau. Wrth i’r tywydd oeri rydym wedi dechrau dysgu am y tymhorau a beth sydd yn newid wrth i’r misoedd fynd heibio. Dysgom am dymor y Gaeaf a buom yn ffodus iawn i weld bach o eira yn disgyn wrth chwarae yn ein hardal allanol. Braf oedd gweld llawer o wynebau hapus iawn y diwrnod yna. Rydym wedi mwynhau gwrando ar storiâu gwahanol yn y dosbarth. Fe wnaeth pawb fwynhau gwrando ar y stori ‘Pengwin ar ei wyliau’ a chymryd rhan yn y llawer o weithgareddau wnaeth ddilyn. Buom yn paratoi bag i’r pengwin i fynd ar wyliau ar gyfer llefydd poeth ac oer, adeiladu cwch i’r pengwin deithio ar y dŵr yn yr ardal adeiladu a thynnu llun ein hoff ran allan o’r stori gan ddefnyddio deunyddiau gwahanol. Rydym yn edrych ymlaen at ddysgu mwy o bethau diddorol ar ôl hanner tymor.  

Blwyddyn 1

Mae Blwyddyn 1 wedi bod yn cymryd rhan yn RSPB Big Garden Birdwatch, gan ddysgu llawer o ffeithiau diddorol am wahanol adar, sut i’w hadnabod, a sut y gallwn eu helpu yn ystod misoedd oer y gaeaf. Mae’r plant wedi mwynhau gweld adar, gwrando ar adar yn canu, a thrafod pa mor bwysig yw gofalu am fywyd gwyllt. I ddyfnhau ein dysgu, aethom ar ymweliad i Safle Ailgylchu Nant y Caws, lle buom yn archwilio sut y gall sbwriel effeithio ar adar ac anifeiliaid eraill. Roedd y plant yn wych wrth drafod pam mae ailgylchu’n bwysig a pham y dylem bob amser roi ein sbwriel yn y bin. Mwynheuon nhw’n arbennig yn bod yn ymarferol ac yn weithgar yn yr awyr agored. Roedd ein taith i Ganolfan Gwlypdiroedd Llanelli yn ffordd berffaith o orffen yr hanner tymor. Roedd y plant wrth eu boddau yn dipio pyllau, archwilio’r gwlypdiroedd ac yn mwynhau treulio amser yng nghanol byd natur. Uchafbwynt y diwrnod oedd gweld y flamingos - 68 ohonyn nhw! Er i’r plant fod yn ddoniol iawn (ac ychydig yn siomedig!) nad oedd yn 67! Ym Mathemateg, rydym wedi bod yn cymryd rhan mewn llawer o weithgareddau ymarferol. Dilynasom rysáit i wneud bwyd adar, gan ddefnyddio ein sgiliau pwyso a mesur. Mesuron ni hefyd amrediad adenydd adar a datrys problemau drwy ddewis y deunyddiau gorau i’w defnyddio. Dangosodd y plant sgiliau cydweithio gwych a chwilfrydedd naturiol. Mae ein gwaith creadigol wedi canolbwyntio ar dynnu lluniau o adar yr ardd yn fanwl gywir ac yn ofalus. Mae’r plant wedi ymarfer rhoi a derbyn adborth, yn meddwl am yr hyn aeth yn dda a sut y gallant wella eu gwaith. Maen nhw wedi gwneud cynnydd bendigedig! Ar ôl yr hanner tymor, byddwn yn parhau â’n thema drwy ddysgu am ailgylchu ac archwilio sut mae sbwriel yn effeithio ar anifeiliaid sy’n byw yn y môr. Rydyn ni’n gyffrous iawn i adeiladu ar bopeth rydym wedi’i ddysgu hyd yn hyn.

Blwyddyn 2

Mae'r hanner tymor hwn wedi bod yn llawn dop o gyfleoedd dysgu hwyl a chyffrous. Fe ddechreuon ni'r flwyddyn wrth ddysgu am sut mae'r Flwyddyn Newydd yn cael ei ddathlu ledled y byd a rhannu'r wybodaeth hon gyda chi yn ein gwasanaeth dosbarth. Gobeithiwn eich bod wedi mwynhau cymaint ag y gwnaethom ni. Ar ôl i ni gwblhau ein gwasanaeth, fe neidion ni'n syth i'n thema newydd ar gyfer y tymor. Ein cwestiwn yw 'A all ailgylchu helpu i gadw Cymru'n gynaliadwy?'. Gan ganolbwyntio ar ailgylchu, fe aethon ni i'r ganolfan ailgylchu yng Nghaerfyrddin. Roedd hyn yn llawer o hwyl a dysgon ni lawer o ffeithiau diddorol a gweld rhai eitemau anhygoel a oedd wedi'u hailgylchu yn barod i'w hailddefnyddio. Wrth ddysgu am ailgylchu, fe agorodd y drws i ddatblygu ein sgiliau daearyddiaeth trwy ddeall yr effaith y gall eraill gael ar ei gilydd a'r byd o'n cwmpas, a datblygu ein dealltwriaeth o'r hyn sy'n creu byd hapus a'r hyn sy'n gwneud byd trist. Gan barhau â'n ffocws daearyddiaeth, dysgon ni am y 4 pwynt o'r cwmpawd a defnyddio'r wybodaeth hon i helpu i ddatblygu ein gallu i rhoi cyfarwyddiadau ar fapiau. Rydym hefyd wedi cael amser gwych  yn y Disgo Santes Dwynwen a’n Disgo Tawel ar Ddydd Miwsig Cymru.Rydym wedi mwynhau wythnosau cyntaf ein thema newydd yn fawr iawn ac rydym yn edrych ymlaen at barhau â hyn ar ôl yr hanner tymor.

Blwyddyn 3

Am hanner tymor prysur a chyffrous rydym wedi’i gael ym Mlwyddyn 3!  Mae’r plant wedi bod yn dysgu am ddeunyddiau naturiol a synthetig. Rydym wedi trafod eu manteision a’u hanfanteision ac wedi ystyried ble maent yn cael eu defnyddio mewn bywyd bob dydd. Mwynhaodd y dosbarth yn arbennig ragweld pa ddeunydd fyddai orau ar gyfer gwisg nofio ac yna arbrofi gyda gwahanol ddeunyddiau i brofi eu syniadau.   Yn ein gwersi mathemateg, rydym wedi bod yn gweithio’n galed ar fesur perimedr ac ar adnabod siapiau 2D a 3D. Mae’r plant wedi dod yn llawer mwy hyderus wrth ddefnyddio mesuryddion yn gywir ac wrth adnabod priodweddau amrywiaeth o siapiau.   Ein genre  y tymor hwn oedd trafodaeth. Rydym wedi dysgu beth sydd angen ei gynnwys wrth ysgrifennu neu wrth gynnal trafodaeth gytbwys, gan gynnwys rhoi rhesymau dros wahanol safbwyntiau. Mae’r plant wedi creu argraff fawr gyda’u syniadau meddylgar a’u gallu i fynegi eu barn yn glir.   Roeddem yn ffodus iawn i gael gweithdy gyda Helen O’Sullivan. Dysgom ni fod y rhan fwyaf o jîns yn cael eu gwneud yn Tsieina. Buom yn edrych ar yr amodau gwaith gwael, y llygredd sy’n rhedeg i’r afonydd a’r cyflogau isel y mae gweithwyr yn eu derbyn. Gwnaeth hyn i’r plant feddwl yn ofalus iawn am ffasiwn gyflym. Fel rhan o’r gweithdy, gwnaethom tie-dye gan ddefnyddio finegr, dŵr a thyrmerig – roedd yr ystafell ddosbarth yn drewi o finegr am ychydig oriau, ond roedd y canlyniadau’n drawiadol iawn! Wedyn fe wnaethom baentio ffabrig i brotestio yn erbyn ffasiwn gyflym, a gorffennom y diwrnod yn ymlacio wrth ddysgu gwnïo.   Yn ein gwersi Addysg Gorfforol rydym wedi bod yn dysgu am wahanol siapiau gymnasteg ac wedi creu ein trefnau ein hunain. Mae wedi bod yn hyfryd gweld hyder a gwaith tîm y plant yn datblygu.   Roeddem hefyd yn hynod falch o’n gwasanaeth dosbarth diweddar. Diolch yn fawr i bawb a ddaeth i’w weld – roedd y plant wrth eu bodd yn perfformio i chi.   Yn olaf, diolch am eich cefnogaeth gyda’r profion sillafu dros y bythefnos ddiwethaf. Mae eich cymorth gartref yn gwneud gwahaniaeth mawr iawn. Gobeithio y cewch chi hanner tymor hyfryd. Mwynhewch eich amser gyda’ch gilydd, ac edrychaf ymlaen at glywed am eich anturiaethau pan fyddwn yn dychwelyd.

Blwyddyn 5

Mae Blwyddyn 5 wedi cael dechrau ysbrydoledig ac egniol i’r flwyddyn a’r tymor newydd. I arwain ein dysgu, rydym wedi dewis y cwestiwn mawr: “A all newidiadau bach wneud gwahaniaeth mawr?” Bydd hyn yn siapio ein hymholiad wrth i ni archwilio daearyddiaeth Cymru, cynaliadwyedd, a beth mae’n ei olygu i fod yn ddinasyddion ymwybodol sy’n cymryd camau ystyriol ac moesegol yn y byd o’n cwmpas.   Dechreuodd ein hymholiad cyntaf gyda rhywbeth cyfarwydd iawn: poteli llaeth wythnosol yr ysgol. Sylwodd y disgyblion ein bod yn defnyddio o leiaf 20 o boteli plastig bob wythnos. Sbardunodd hyn drafodaeth am wastraff plastig a sut y gallem ei leihau. O hyn, bu’r dysgwyr yn archwilio deunyddiau cynaliadwy yn eu gwersi ysgrifennu ac ysgrifennu llythyr meddylgar at Gyngor Sir Gâr, yn ystyried a fyddai newid i boteli gwydr yn opsiwn realistig. Mae’r drafodaeth hon wedi helpu pawb i sylweddoli sut y gall newid bach arwain at effaith fawr.   Mae Blwyddyn 5 hefyd wedi bod yn brysur yn ailbwrpasu llawer o’r poteli llaeth plastig rydym fel arfer yn eu hailgylchu. Maen nhw wedi’u troi’n botiau planhigion, caniau dyfrio a photiau pensil — ychwanegiadau hyfryd at ein hystafelloedd dosbarth, ac mae’r plant yn falch iawn ohonynt! Gan ddefnyddio eu sgiliau dadlau, crëwyd iMovie yn trafod manteision ac anfanteision gwahanol fathau o laeth sy’n cael eu gwerthu yn y siopau, a pha rai sydd orau neu waethaf i’n hamgylchedd.   Ar ôl hanner tymor, mae Blwyddyn 5 yn edrych ymlaen at barhau â’u hymholiad a darganfod mwy o newidiadau bach a all wneud Trimsaran yn lle gwell.   Yn ogystal â hyn i gyd, mae Blwyddyn 5 wedi bod yn brysur yn y gegin bob Dydd Mawrth, yn coginio prydau blasus fel chow mein, chasseur, a phancws. Mae’r disgyblion wedi mynd â’u prydau adref ac wedi’u gwerthu hefyd yn y Bocs Bwyd Blasus, gan ddysgu sgiliau bywyd newydd wrth godi arian ar yr un pryd.

Cafodd Dydd Miwsig Cymru ac Wythnos Iechyd Meddwl Plant eu dathlu ar ddydd Iau, Chwefror 12fed, ac roedd yr ysgol yn llawn lliw a brwdfrydedd wrth i’r disgyblion nodi’r achlysur. I ddathlu’r iaith a diwylliant Cymreig, cafodd y disgyblion wisgo eu dillad eu hunain am y diwrnod, gan greu awyrgylch hamddenol a dathliadol ledled yr ysgol. Un o uchafbwyntiau’r diwrnod oedd y disgo tawel, a fwynhaodd y disgyblion yn fawr. Gyda chlustffonau ymlaen a cherddoriaeth Gymraeg yn chwarae, cafodd pawb gyfle i ddawnsio, cael hwyl, ac ymgysylltu â cherddoriaeth Gymraeg mewn ffordd fywiog a chofiadwy. Roedd y digwyddiad yn llwyddiant mawr ac yn ffordd wych o hyrwyddo mwynhad o’r iaith Gymraeg drwy gerddoriaeth a dathlu.